చాలు నీకీ అన్నమయ్య సంకీర్తనలు!

by K.S.M.Phanindra

అన్నమయ్య కీర్తనలు నేను విన్నది తక్కువే. విశ్వనాథ్ సినిమాల్లో విన్న కీర్తనలు నాకు చాలా నచ్చేవి. అయినా ఎప్పుడూ అంత శ్రద్ధగా అధ్యయనం చెయ్యలేదు. నా సహోద్యోగి శ్రవణ్ (అన్నమయ్య సంకీర్తనలకి తనవంతు ప్రచారం చేస్తున్న ఔత్సాహికుడు, భక్తుడు. ఇతని బ్లాగు http://annamacharya-lyrics.blogspot.com/ చాలా ప్రసిద్ధి చెందింది) పుణ్యమా అని రెండు అన్నమయ్య పుస్తకాలు చదివాను ఈ మధ్య. ఒకటి జయప్రభ గారి పుస్తకం, అన్నమయ్య సాహిత్యం గురించి. రెండవది పప్పు వేణుగోపాలరావుగారి ఉపన్యాసాల సంపుటి (Flowers at this feet). ఈ పుస్తకాలు చదివి పొందిన స్పందనతో, అన్నమయ్యపై ఆరాధనతో ఒక చిరు ప్రయత్నం చేశాను ఆయన జయంతి సందర్భంగా.

ఒక పాట రాయాలనిపించింది అన్నమయ్య కీర్తనల గురించి. నాకున్న భాషా జ్ఞానం, పాండిత్యం, ఆధ్యాత్మిక జ్ఞానం అతిస్వల్పం కాబట్టి ఈ పాట కూడా సాధారణంగానే ఉంటుంది. పాట ఎత్తుగడ కొంత అన్నమయ్య శైలిలో ఉన్నా అన్నమయ్య వాడే రెండవ అక్షరం ప్రాస నియమం నేను పాటించలేదు. పాటలో తప్పులు ఉండే ఉండచ్చు కూడా. ఈ పాట కేవలం భక్తిభావంతో చేసిన ప్రయత్నంగా భావించ మనవి.

పదకవితా పితామహుడు, హరిసంకీర్తానాచార్యుడు, పంచమాగమ సార్వభౌముడు అయిన అన్నమాచార్యని జయంతి సందర్భంగా ఇదే నా వినమ్ర నివాళి -

చాలు నీకీ అన్నమయ్య సంకీర్తనలు
వేల భార్యల కన్నను మేలైన సిరులు

దేవభాషకు కూతురైన తేటతెలుగే చాలు
అమృతమ్మును మాని కొంత భక్తి రసమును గ్రోలు
నీకు సరి ఇవి నీవె ఐనవి

నిత్యపూజల కన్ననివియే నిత్యమైనవి నీకు
ఉత్సవమ్ముల కన్ననివియే వేడుకైనవి నీకు
ధన్యుడైతివి పదము వలన

ఎదను కడిగే మథురకృతులే నీకు అభిషేకములు
లోన వెలుగును ఎరుక పరిచే ఉపనిషద్దీపికలు
నీదు గుడికివి వేదఘంటలు

దాచుకొమ్మని నిన్ను వేడే అర్పణాకుసుమాలు
బ్రోచు మమ్మని శరణుకోరే భక్తిశృంగారాలు
నీకు ప్రియమీ ముక్తిప్రదములు

YouTube లో ఈ పాట వినొచ్చు –