శూన్య సంగీతం

నిశ్శబ్దంలోకి నేను జారిపోతున్నాను

ఏదో అగాధంలోకి

తెలియని శూన్యంలోకి

జారిపోతూనే ఉన్నాను

 

ఆలోచనల కీచురాళ్ళ రొదని

దాటానో లేదో

శూన్యంలో కొత్త సంగీతం పలకరిస్తోంది

 

లోకం నక్షత్రాలని ఏరుకుంటోంది

ఆకాశం జాలిగా చూస్తోంది

చందమామ నిశ్చలంగా నవ్వుతున్నాడు

నేను వెన్నెల నిచ్చెన ఎక్కి దిగంతాల్లోకి వ్యాపిస్తున్నాను

 

ఈ అస్పష్ట అనుభూతి అస్పష్టంగానే ఉండాలి

తెలియనితనంలో ఉన్న ఆనందం తెలుసుకోడంలో లేదు

హృదయసమాధిలోంచి ఏవో ప్రశ్నలు దెయ్యాల్లా లేచివస్తున్నాయి

నేను మాత్రం ప్రశ్నకి అందని ప్రశ్నలా..