అనగనగా ఒక అబ్బాయి. పేరు రామ్మోహన్. మాటలో సౌమ్యుడు, మనసులో మంచివాడు , బుద్ధిలో కుశలుడు, స్నేహంలో ఉత్తముడు. వీటికి పుస్తకాల పిచ్చీ, ఆధ్యాత్మిక చింతనా కూడా తోడయ్యాయి.
కట్ చేస్తే…
అనగనగా ఓ అమ్మాయి. పేరు శిరీష. ఆమె నవ్వులో తెలుగింటి కళ తళతళలాడుతుంది. ఉరుకూ, చురుకూ, ఆటా, పాట, సరదా, పరదా ఆమెకు best friends!.
వీళ్ళద్దరూ నాకు తెలుసు. కానీ వీళ్ళద్దరూ ఒకటవుతారని అనుకోలేదు. ఐతే ప్రేమ చిలిపిది కదా – ఎప్పుడు పుడుతుందో, ఎవరిని కలుపుతుందో, ఏ కథ నడిపిస్తుందో ఎవరికీ తెలియదు. ఈ మధ్యే పెద్దల అంగీకారంతో, దంపతులైన ఈ సరికొత్త జంటకి శుభాశ్శీస్సులుగా “గణేష్” చిత్రంలో “సిరి సిరి మువ్వలు” పాట ట్యూన్ లో ఒక పాట రాయడం జరిగింది. ఇక్కడ “సిరి” అంటే శిరీష. పల్లవిలో పేళ్ళి గురించి ప్రస్తావించి, మొదటి చరణంలో సిరి గురించీ, రెండో చరణంలో రాం గురించీ, ఆఖరి చరణంలో వాళ్ళ వైవాహిక జీవనం గొప్పగా సాగాలని ఆకాంక్షిస్తూ రాశాను. ఈ కొత్త జంటకి నా శ్రీమతి “హరిత” gift ఇచ్చిన ఫొటో అసలైన అదనపు ఆకర్షణ.
సిరి సిరి సొగసుల్లో విరిసిన నవ్వులు
మా మోహన రాముడికి జతగా కలిసేను
తొలి తొలి ప్రేమల్లో తీయని ఊసులు
తలపుల అక్షతలై తలపై కురిసేను
జంటంటే ఈ జంటే అంటారందరూ
చూస్తుంటే పండుగలా ఉందీ అంటారు
గుండెలో ఆనందాలే పొంగే సందడిలో
దీవెనై దిగివచ్చారు దివిలో దేవుళ్ళు
తెలుగు ఇంటి మాలక్ష్మిలా ముచ్చటైన పిల్లా
బుగ్గచుక్క పెట్టిందిలా ముద్దబంతి లాగ
సీతమ్మై ఎద మీటిందో
సిరిమువ్వై కదిపిందో
మా రాముని మానసమంతా
తన కొంగున కట్టిందో
పున్నమి తానై నవ్విందంటే
జాబిలి తానే పరుగున రాడా
మాటలోన ఆప్యాయత మనసులోన మమతా
మంచిలోన మామంచిగా మా పిల్లవాడు లేడా
ధ్యానంలో మునిగిన వేళ
హృదయంలో మెదిలింది
బ్రతుకంతా ఆమని లాగ
పూయించే పూబంతి
చెయ్యందించి రమ్మని పిలిచే
కమ్మని కలలే ఇక మొదలాయె
ఒకరికొకరు ప్రాణాలుగా
ఒద్దికైన జంటా
ప్రేమ మీకు పారాణిగా
తోడు ఉంది వెంట!
అనుబంధం మీ సొంతంగా
అనిపించే మీ జంట
అనునిత్యం ఆనందంగా
అలరారే సిరి పంట
ఈ కళ్యాణం ఈ వైభోగం
జీవితమంతా నిలిచే యోగం
