ఎందుకు ఎందుకు
"పా" అన్న హిందీ చిత్రానికి ఇళయరాజా సంగీతం అందించారు. ఈ సినిమా పాటల్లో "ముడి ముడి" అన్న పాట నన్ను ఎక్కువ ఆకట్టుకుంది. ఈ పాట మూడు వెర్షన్స్ లో వస్తుంది. రెండు వెర్షన్లు ఆనంద గీతాలైతే మూడోది శోకగీతం. ఈ శోకగీతం వింటున్నప్పుడే నాకు సందర్భం కళ్ళ ముందు మెదిలింది. అంటే సాహిత్యం అర్థం కానీ వారికైనా ట్యూన్ వింటే అన్నీ అవగతమయ్యేలా స్వరపరిచిన ఇళయరాజా గొప్పతనం అది. ఒక రిలేషన్లో ఉన్న ఇద్దరు విడిపోతున్నప్పుడు కలిగే బాధకి స్వరరూపం ఈ పాట అనిపించింది నాకు. ఈ రిలేషన్ అన్నది ప్రేమ కావచ్చు లేక పెళ్ళి కావొచ్చు. కొన్నిసార్లు ఈ విడిపోవడం అన్నది ఒకరి తప్పిదం వల్ల జరిగేది కాదు. కొన్ని పరిస్థితుల వల్ల విడిపోక తప్పని స్థితి ఎదురుకావొచ్చు. ఇలాంటప్పుడే "ఎందుకు ఇలా జరిగింది" అని లోలో ఒక ప్రశ్న ఉదయిస్తుంది. ఇలాటి కొన్ని ప్రశ్నలకి గేయరూపమే ఈ పాట.
దాదాపు ఒక సంవత్సరం క్రితం రాసిన ఈ పాటని ఇప్పుడు పాడి బ్లాగీకరిస్తున్నాను. నేను పాడడం పాటని పాడుచెయ్యడమే కనుక ఇళయరాజాకి క్షమాపణలు!
ఎందుకు ఎందుకు ఇలా ఎందుకు జరిగెనెందుకు?
ఎందుకు ఎందుకు ఇలా నాలో ప్రశ్నలెందుకు?
ఎందుకు పాదం గతం విడిచి కదలదెందుకు?
రేపటి తీరం పొద్దై పొడిచి దొరకదెందుకు?
ఎందుకూ నిజం ఇలా తరిమెనెందుకు?బాధే తోడుగా జంట కలిసిందిగా
బంధం జాలిగా సెలవు అంటోందిగా
పువ్వే ఇలా ముల్లాయెనా
కన్నీటిలో కల వాడెనా
సెలయేరిలా కడలాయెనా
కల్లోలమే వలపాయెనా
ఎందుకు జాబిలే జారిపోయె
ఎందుకు జీవితం బోసిపోయె
ఎందుకు కథే సగం మిగిలిపోయె మరిఎందుకు ఎందుకు ఇలా ఎందుకు జరిగెనెందుకు?
ఎందుకు ఎందుకు ఇలా నాలో ప్రశ్నలెందుకు?
ఎందుకు పాదం గతం విడిచి కదలదెందుకు?
రేపటి తీరం పొద్దై పొడిచి దొరకదెందుకు?
ఎందుకూ నిజం ఇలా తరిమెనెందుకు?
